Peter Pan
夜晚去演藝學院睇Peter Pan Musical。好耐冇睇呢類藝術節目，之前睇報導一致好評，都唔理係唔係細路o野就決定去囉。果然，有好多觀眾都係一家大細去睇，見到張堅庭成家，又見Janet Ma帶住幾個細路。故事非常簡單，Peter Pan同幾個小朋友(三姊弟)Wendy, Michael,John 對抗海盜Captain Hook。Captain Hook因為講咗一句"I don't believe in fairies." 搞到個森林的fairies暈晒，最後當然打敗Captain Hook及一班海盜，fairies好番，個森林又充滿生氣。
呢個雖然係一個小朋友的故事，但係製作都幾認真，我頗欣賞以下幾樣。開場一輪勁歌熱舞後，一班海盜出場，但係佢地係台下混入觀眾度出現，非常有驚喜。我雖然坐樓座，都有幾個海盜係我附近唱歌跳舞，頭幾行的小朋友更加可以摸到d海盜。第二，就係呢個劇的重點 - 飛。Peter Pan固然會飛，只見佢跳跳吓舞，轉轉吓圈就飛起咗，真係幾令人興奮。當Tinkerbell將flying dust灑係3 個小朋友身上，佢地又一個個飛起，係一個假的倫敦黑夜天空上飛去Neverland，感覺非常正。第三就係最尾的舞台效果，真係非常正，仲睇到我嘩一聲叫咗出黎。最尾一幕，Peter Pan跳跳吓舞又飛起咗，仲係舞台一下子飛到去Balcony咁高，即係飛到我正前面，佢又一面灑金粉，上面又同一時間又噴好多番皂泡下來，真係仙境一樣呀!!完全估佢唔到。個故事有d悶，但最尾個幕真係抵番晒，我睇到好開心，見到有人咁近距離飛來飛去，好似發緊夢。雖然我知道係有威也，不過做到冇乜破綻，要好留心先會見到條好幼的鋼絲。唔好抱太高期望，用細路的心態去睇，呢套係一套睇得人好開心的Musical。
想知仲有咩好野，下次再黎喇!
沒有留言:
張貼留言