1 July 2007
回歸十週年，放假一天。諗起十年前仲讀緊中學，當時係F.4的暑假，回歸前一晚就通宵睇電視直播主權回歸交接儀式。個晚睇住英國米字旗徐徐落下，跟住就升起中國的五星紅旗，香港特區政府成立，一班高官就宣誓就職。之後睇住彭定康一家同查理斯王子係大雨下揮手拜拜，上郵輪撤離香港。當年都仲係細，冇乜特別感覺，只係做一個歷史的見證，即係一個bystander的角色，當日都有寫日記，不過都唔記得咗寫乜。
呢十年香港發生咗好多野，自己都由一個中學生變做一個已經做咗幾年野、轉過幾份工的社會一份子。十年內有幾件很深刻的事。亦是97年，9月1日開課那朝早正在梳洗，突然知道戴妃在前一晚車禍中死了。那是第一次覺得死亡會來咁突然。有乜可能呀，之前一個星期先見到佢和那個新男友出海在遊艇曬太陽，點會一下子就死咗呀?接著那幾星期的課堂都有討論戴妃之死，英文堂Journal寫感想，又討論傳媒的責任，對王子的影響等等。威廉同我差不多年紀，佢當時咁細就要面對咁大的打擊，真係幾可憐。又記得那個全球直播的喪禮，那片白金漢宮前的花海和那首Candle in the Wind。
到2003年，那年特別多事。春天，開始揭發第一宗SARS時，都沒有想到這個病會一直以倍數擴散開去。每次看新聞，聽到受感染和死亡人數一直上升，而且還未有藥物可以治療，都感到非常沮喪。記得淘大花園那些居民被送到郊區隔離，後來又宣佈所有學校停課。那時是Year 2 SemB，每科還有幾堂便要考試，我們停了幾堂還是繼續上學補課，全班同學戴口罩上堂、考試。唔戴口罩又唔俾入課室，唔戴口罩出街就好似冇著衫咁，俾人望住。當時條街真係好靜，人人都戴口罩，就算有人都唔會有聲，每個人之間都有好大的隔膜。以前見慣熱鬧嘈吵的香港，真係好唔慣，覺得好反常，整個香港死氣沉沉，個人好絕望。個時我成日諗：香港係唔係真係玩完?有排仲話香港宣佈成為疫埠，好彩都係傳言，呢個傳言過咗之後，感染人數就一直下降，直到那一天感染人數係 － 零呀......真係開心到痺，立即全城除口罩慶祝啦。
2003年七一大遊行，我當然有身體力行成為五十萬人之一。當日著住黑色衫，在銅鑼灣等出發，係百德新街企咗差不多三個鐘先開始行，一路行去中環立法會，因為冇力行唔到上政府總部。個時真係對政府好不滿，有個好強烈的意識要去遊行，就算冇人同我去行，我都會自己一個人去遊行。好彩，我的同輩中都有好多人對老董不滿，我又未至於一個人去遊行。
2003年911仲大件事。睇住電視機畫面，那架飛機撞向世貿，心諗係唔係整蠱呀？飛機裡有冇人架?過幾秒就睇住成幢樓塌落黎。當時我睇住個電視真係呆咗，越睇越心寒，一面流眼淚，唔明點解ｄ恐怖份子會有同歸於盡的心態，係世貿裡面做個野ｄ都係精英，又係無辜，真係死得冤枉。呢件事令我真正覺得呢個世界越來越亂，再冇一個絕對安全的地方。之後有好多紀念活動，又有好多捨己救人的事跡被揭發，就係有呢d咁偉大無私既人才顯得恐怖份子的醜陋邪惡。希望所有人識得分辨正邪，唔好再有呢d人為的大災難發生，人類互相殘殺係非常愚蠢的事。點解唔可以世界大同? Give Peace a Chance!
真係扯得太遠喇，咁又十年，回歸假期咁又過。同香港一齊「成長」，有時見到有ｄ社會政策或者有ｄ事真係好唔合理，但係又唔知自己可以做到乜。都好做好本份，過好未來十年，同埋以後好多個十年......香港是我家，香港始終有你...我地大家用艱辛努力寫下那不朽香江名句。
想知仲有咩好野，下次再黎喇!
2 則留言:
你好利害,10年前,我只係日日返學訓覺,淨係掛住做自己鍾意既事既一個傻仔...到今日做左記者,近排要寫一篇回歸10年既稿,先睇返呢10年既事...而家先有感覺...見返肥彭食蛋撻、英國旗落下...到而家先有失落感。10年前的你已有的感覺,我遲了10年才feel到,卻一樣強烈。
回想起來，十年前的感覺係叫若有所失。一直以來，殖民地政府推行的政策將香港由一個小漁港發展成為今日的國際大都會:九年免費教育，相宜的公屋及居屋，快捷準時的鐵路網，廉潔的政府，相對完善公平的法律制度，全是英國政府在香港建立成功的基石。如果香港沒有殖民化，根本沒有可能以現在這樣先進的姿態去帶起中國南部的發展。雖然常聽說英國發展香港出於利己的經濟因素，但我真心認為香港在殖民政府時期真係繁榮盛世，亦都好慶幸地成長於經濟起飛的八十年代。再睇番特區頭幾年社會經濟一塌糊塗，搞禍晒，對回歸真係冇好感。米字旗不復再，但始終都會記住殖民地時代的光輝歲月。
張貼留言