Les Demoiselles de Rochefort (1967)
今年French May揀了3齣電影，第一齣就係呢套「柳楣花嬌」。首先講戲名，呢個名雖然唔係好關事，字面上亦估唔到齣戲講咩，但我好鍾意喎。大綱係一對孖生姐妹的愛情故事，姐姐Solange(Francoise Dorleac)會作曲和彈琴，偶然機會下遇上佢一直欣賞的作曲家(由Singing in the Rain「萬花嬉春」的Gene Kelly客串。好奇怪，佢一出場，好多觀眾大笑。)，最後當然係埋一齊。妹妹Delphine(Catherine Deneuve)就鍾意跳舞，朝思暮想會見到白馬王子同覓真愛。另一邊，有個水兵成日幻想夢中情人，畫咗一幅畫，畫中人就同細妹好似。呢齣戲都係講人與人的緣份。當見到兩個應該「運線」的人擦身而過，緣慳一面，好多人都會覺得可惜，我聽到其他觀眾都有咁既反應。想見的人，明明在身邊，或者經你身邊人的介紹下會慢慢走到你附近，但突然間，佢地又會相反方向咁行，永遠冇機會再見。戲中常出現的橋段，姐姐會遇到水兵，個水兵又會叫佢去欣賞佢心中女神的畫像。作曲家想再遇姐姐，偏偏只撞見妹妹。整套戲就係呢d twist吊住觀眾條癮，令人好想知究竟兩對人會唔會走在一起。好明顯，姐姐個pair最後在琴行相遇團圓，尚算圓滿。但係妹妹同水兵究竟有冇相遇?呢個係open ending，二人始終前後腳出場，絕無同場相遇的場面。我都唔清楚個水兵最後係唔係上咗那架戴住細妹去巴黎的車。就當佢地係架車相遇相識，然後一齊去巴黎延績呢個故事。
呢齣戲係歌舞片，所以色彩繽紛，又有靚人靚衫。所有衫的顏色都係絕襯，雖然好多場口兩姐妹都只穿同款連身裙，但一共有好多種顏色，有粉紫同粉紅，粉黃同桃紅，兩姐妹同場的戲最好睇，而且連配角的衫都玩撞色，橙撞藍，紅撞綠，全部都係contrast colour，唔理內容，齋睇衫同跳舞都大有視覺享受。女主角現實中真係兩姐妹，唔怪得咁似樣。Catherine Deneuve當時只得24歲，但我覺得佢開始有點滄桑，不過都係靚既。最衰買唔到佢另一經典作Les Parapluies de Cherbourg的飛，大約5、6年前睇過，只記得又係襯晒色，但故事已忘記。更可惜係姐姐係呢齣戲上映同年因車禍身亡，當年只得25歲。如果仲在生，可能同Catherine Deneuve一樣咁出名，做法國影壇殿堂級一姐。
題外話講戲名。好鍾意以前的戲名多數用四宇詞語，又有典故，少d文化修養都起唔到呢d戲名，如果俾時下戲行人改，或者如果要我起個名，最多只會直譯叫做「Rochefort雙嬌」或者咩「Rochefort少女」(哈，非常差)。仲有呀，好多戲名如果直譯，只會唔夠傳神。其他好戲名例子有:我最鍾意的Der Himmel uber Berlin(Wings of Desire 「柏林窮蒼下」， 中英都譯得好)，Casablanca「北非諜影」，Cinema Paradiso「星光伴我心」，Somewhere in Time「時光倒流70年」，Roman Holiday「金枝玉葉」，Breakfast at Tiffany's「珠光寶戲」，Funny Face「甜姐兒」，Sound of Music「仙樂飄飄處處聞」，Gone with the Wind「亂世佳人」。除Gone with the Wind因太長太悶我未睇晒外，以上所有戲我都睇過，覺得所有都好傳神。戲名好重要，改得好可以吸引人睇。以上提的都係經典好o野，有機會要欣賞吓呀!
想知仲有咩好野，下次再黎喇!
沒有留言:
張貼留言