20 May 2007
Model Shop (1968)
《模特兒商店》乃丹美越洋之作。加利．洛活飾演一名失業建築師，拜倒法國女人羅拉(Anouk "Lola" Aimée)的石榴裙下。她是模特兒商店的老闆娘，讓寂寞的男子藉為性感女郎拍照而解寂寥。影片的故事性不強，只是連串的偶然事件。丹美似是透過本片以歐陸眼光檢視美國青年文化：時裝、汽車、迷幻音樂、毒品、地下報章、反文化意識及越戰。人性的無序，生命的無常，在看似無關痛癢的表面下，實藏著對愛及人生目標的渴求。這齣《羅拉》續集荷里活版，本來丹美點名由夏理遜．福主演，最後難成美事，未知是福是禍。 (節錄自http://bc.cinema.com.hk/adhoc/demy/film05.html)
這是今年French May最後一齣欣賞的電影，亦是令我非常失望的作品。原來，呢套係英文戲，早知就唔睇啦! 齣戲完全冇高潮位，非常淡淡然，仲平淡過岩井俊二o個類日本戲，不過岩井都叫唯美派。我諗起竹中直人的「東京日和」仲好睇，故事平淡但都叫有景睇吓。呢套戲真係平舖直敍，悶到令人瞓著。如果好似影評講齣戲係描繪美國六十年代青年文化，咁用一個咁平淡的故事帶出就唔多夠深入喇。戲裡有當年的象徵，如Hippies、大麻、反越戰、桌球、夾band、Vintage車等等，但都只是象徵式的片段而唔可以結合成一個完整的故事。個男主角高大有型，角色是建築系畢業生但木獨冇表情，最後無奈被徵召入伍打越戰。齣戲係唔係想暗示當年的青年人因越戰，所以好有理想抱負都要鬱鬱不歡，垂頭喪氣呢?真係不明所以，一味靠估。我自問都唔怕悶，但呢齣係我睇過的所有電影中，最悶的Top 5之一。
今年French May的專題導演 – Jacques Demy應該都唔算出名，就我睇過的電影，佢的作品好壞參半。「雪堡雨傘」成功帶將Catherine Deneuve「打入國際市場」功不可沒，亦都係導演教為人熟悉的作品。同當年其他所謂「新浪潮」的導演比較，Jacques Demy的名氣、代表作都真係比下去。難怪有次同兩個偶遇搭枱的法國人講起，佢地都異口同聲話未聽過呢位導演，但問我d電影係唔係Catherine Deneuve做主角，可見Deneuve係佢地心中幾有地位。(按:French banknotes & coins的人樣好似話係用Deneuve做藍本o忝呀，真係威!)
想知仲有咩好野，下次再黎喇!
沒有留言:
張貼留言